Mark 12

Anabari N Yesu Bei Da

1Anyi ɓesisi nyi Yesu ɓei si ga za n sayi-yi. “Zaho ɓo nu aje-mui-fwa, wa nyami ko n Shekna dna mi. Wa ɓwokun nyi ntu na jemui-gma pi ɓo. Wa ofwa wyednai nyakun mi n latu she. Wa pmi wa fwa yadna na haya da kun. Wa laka wa lo kni do n kpai. 2Sa na jemui-ka sa ɓela si, wa tnu n wo bara yi gmanyi wa gwo odo gawo n kwo ɓa zhin wo nya. 3Ama a fwa daɓa luwo, ɓa jewo zeya lo na bwa gbelo yi.

4“Ofwa da waje tnu n zadoyi, ɓa jewo lu n du za kmisun yi, ɓa tuwo ʼci nukwoyi n tukwo. 5Eza nna ɓei je tnu n cei nyi, a wo wu, n navun wa tnu na zaje yi, a lu ɓa ai ce ai wu azaho. 6Zaknayi nu ɓei bwa ce owo ɓigba gmanyi. Wa kmatnu n woi, woi gye ge ɓa ɓa gawo mwa-mwa ntu ge owo ɓi nu.

7“Ama sanu afwayi ɓei gye wo woi ɓe, ɓa cige, ‘Owo nu ɓei gyi wo dada fwa ye gado, owo dadayi lafyi. Fye ɓe ya wu wo n nabai ofwa kwa ze yi nya.’ 8Nlonu ɓa wan wo, ɓa wu wo, ɓa she wo nayi ya n fwa ʼkna vun.

9“Fye gye ge ofwa dagayi ɓa zhin wuna n sanu wa wo ɓo kwa zhan? Wo ɓa ɓe wa wu ɓa vinya wa ga of wa yi na zado akun. 10Fye ta pa aya ye ba ɓo lo dna n Litafim? ‘Kuta n na nyakun miyi laya, kwonu la zhin bwakwonu yakwo dna nyakun, ai ga kwo mwa-mwa ndu a kuta aje, dna n nyakun yi. 11Deye zhin Dagayi ɓezhin-zhin yi nu, kwoi zhin ɓo wowoyi nu.’ ”

Anuwunyi Ye Ba Pi Wo Agam

12A Yahudawa tukwoda ye ɓa wan Wo ntu na ʼnyi ɓesisi ye ɓo. Ɓa ɓei ku kpe ge Wo da ga ɓa nu, ɓan ɓei zhin afwayi anukwoyi dna Wo ɓesisi. Ama ɓa ku wo dna n Wo bwatoyi ntu na ʼza ɓo, ntu ce nu ɓa fwa Wo ɓa lo ɓa nya. 13Ama ɓa tnu na adini n na siyasa tukwoda je yi ɓa daɓo n Woi, ɓai pi Wo agam, n na bai Wa da ɓoho n na ɓa wan Wo n cei.

14Aza wyekayi ɓa ciwo Ge, “Male, yi kpe ge Ho da gaiciya. Ho ta vi aza ɓemwi, kwo aza ɓo pwa-wom, ama Ho wu Shekwoyi zokwo. Nsayiye, gna yi kwo bmiya a gba gadu n na Romawayi aba, kwo awo?”

15Yesu wa ku gye ɓa awun pi ba, wa ci ɓa ge, “Fye ɓe mi n gyiwyeyi, Mi ɓa gnafye.”

16Sanu ɓa ɓei gawo gyiwye, Wa nyaɓa ge, “Nyikado foto nu tu n yeyi n gyiwye ya?” Ɓa ci wo ge, “Esu nu.”

17Wa gna ge, “kwo bmiya lo a gawo nya kwo zhin wonya. Ama nya kwo zhin Shekwoyi nya tilas fya ga Shekwoyi kwo.” Ɓa gye ɓa tukwo dna n vinyikwo to ɓa kpe ɓeye n ɓa ɓa shan dam.

18A Sadukiyawayi ɓa yeɓe aza ba ɓa cige, Kalaku to lo n na vingwom. Ba nya ɓo layi.

19“Male, Musa ɓei gayi wyidna ge n ʼza fyi n tna ɓi owo do ɓa lawo nyikwo wa bwa aɓi gawo zado.

20– 21– 22 ▼

▼The text of verses 20-Mrk 12:22 has been merged.

“To, aza ɓei nyi n gun tnaba, adnagmayi na majei yi. Dnagmayi wa la nyikwo wa fi to woi bwa ɓim. Owo mado wa la nyigbayi ho, ama safyewyi wa fi to woi bwa ɓim. Owo mado wa je wola, sa fyewyi wa je fi to woi bwa ɓim. Har n lonu ɓaku fi vinya to ɓai bwa ɓi n woyin. Nnavun nyikwoyi ho wa wonya fi ce.

23“Nya yi cei pma ya kpe okonu nyi, Dna n Shemi wo ɓei zhin nyikado nyikwo na? Ntuge oɓa vinya zaho to celo n wo to ɓei la wom.”

24Yesu wa dnaɓa ɓe gbe ge, “Bo kwo gna fye gna-gna nyi, fye ta kpe Shekwoyi ɓeda ye lom. Fyei ta kpe Shekwoyi iko ye lom. 25Sa na zadeye ngnu tnaba n nyikwo-zaye yi ɓei kukala n vingwo, ɓa to ɓei shan mula pam, ɓa ɓei ku ze ngye a malaika nu.

26“Ama tu n kalaku nvingwo ɓo, fye to shin-ba dna n Fitowa tu n Musa tukwo n gbe-gbe nagyi yim? Shekwoyi Wa gna Musa ge ‘Eminu zhin Shekwoyi Ibrahim nya Eminu zhin Shekwoyi Ishaku nya Emiyi nu zhin Shekwoyi Yakubu nya.’

27“Shekwoyi ɓei gna Musa nu ge, aza deye kwo shi kwo nyi sala mwa shi ɓa ɓei fi, ɓaye n wye-wyei lo, ntuge Wo to ɓei cige, ʼMi zhin Shekwoyi aza nya n ɓa to lom! Fye ku bwi aba mwa.”

28Zaknayi n na adini malami ɓei gni ɓo woi wo ɓo ɓa da, wa ku kpe ge Yesu la ɓo dnagbe dei-dei. Ntu cenu wa nya ge, ʼDna na awyidna, kni dai nu zhin dnagmayiʼa?

29Yesu wa dna ɓegbe, “Odo kwa ci ge, ‘Fye wo, O, Israila! Eyi Dagayi Shekwoyi gmanyi nu, Shekwoyi do to shasun m.

30“ ‘Kwo zhin tile nu fya yewo fya bugbayi vinya, n fya wye-wyei yi, nfya kala yi.’

31“Bahi, Tile ha ye ho zado n gye hohin tukwo,” Aɓobwashi ho tolo ndu adeye yam.

32Malami yi wa dnaɓegbe, “Ho ku ɓeda gaiciya nya da n Ha ci ge Shekwoyi bwasun gmanyi nu, zaho to shansun lom. 33Mi-i kpe lo ge, kwo dulo ʼza ye wo n wo bugbayi vinya, nwo ɓeyekpe yi, n wo kalayi, maye n ma zajeyi ngye mihin ndu anyaga-ga n zaɓa ga na duwa nyakun nyi.” 34Sanu Yesu ɓei gye wo “Shekwoyi bemi yim.” N deye avun ɓei shan Wo ɓenya m.

35Nsado hoi, shi Yesu ɓei gni woi wu nya na duwa nyakun ba, Wa nyaɓa ɓeda, “Kni nyi nu zhin efya dini tukwoda fyei ci ge, Kristi ɓa gmi n Dawuda byemi nuʼa? 36Gama Dawuda nwohin tukwo ɓei ci ge, ‘Zufun Gyi-gyi-yi nu ɓei daɓo n womi, sanu wo ɓei ci ge, “Shekwoyi ɓei gna emi Dagayi, sase tu mi bwaizhe bwa sai Ma ze oha nuwuyi oha pita kpenya.” ’ 37Shi Dawuda ɓei la Wo yi ge owo Dagayi, Wo ɓa zhin wo ɓi nwuna?” (Ɓeda yepya, kwada aza, ɓa kna tunbua n pwawo yi mwa.) 38Anya doho nyi n Wo ɓei wuɓa n sa deyi, “Fye zhin peceiye na malami yi. Ntu ge ɓa ye ɓa kpe aje yakwo agyiwye-da nya n na ɓeye-kpei, nnabai aza ɓi ɓa gna ɓai yazhi, ɓai zan-zan na gnikwo ba n nabai a gye ɓa wye. 39Ɓa ye a seseba manayi na duwa nyakun, n na mwa-mwa ba yi, aba na zhin aɓo gmada. 40Ama ɓa gyi anyigbayi fi n ɓa puwa n tna vinyikwo. Ntu ge ɓa takpe ɓa haliyem, ɓa laɓa ngye ɓa gyi-gyi-yi ɓai zhin aduwa kpadala yi n na ʼza bye. Ntu deye ɓo, oɓa tata ɓei la du aza nya.”

41Safewyi Wa lo aba na gwo sadaka nyi n na duwa nyakun, Wa sase tu Woi kawye, woi gye shi aza ya agyiwye fi. Anyabwayi hoi ya agyiwye fi n mwa. 42Safewyi nyigbayi ho wa ɓe, nwo to ɓei nyaho yim, wa ya akobo fi ngnu aba.

43– 44Wayi Wo abara wa ci ɓa ge, “nyigbayi, san-yi da yi, n wa ga kobo aba nyi, wo la nya ga n du a gyiwye da ye vinya. Ntu ge ɓa knikni nu ciwyi nɓa nyabwa, ama wa ga enya nu n wo cei kmasun lo.”